അയിലത്തല

തുറമുഖത്തൊളിച്ചിരിപ്പുണ്ടാകും 

തിരകള്‍ക്കിടയിലെന്നും 

വലവീശിയവരുടെ വിരലടയാളങ്ങള്‍ 

പതിഞ്ഞൊരു വന്‍കടല്‍ .

മണത്തു മണത്തു നടക്കുന്നുണ്ടാകും 

എപ്പോഴുമൊരുപ്പുകാറ്റില്‍ ,

വിലപേശിയവരുടെ 

വിയര്‍പ്പും വായ്നാറ്റവും.

വഴിപോക്കന്‍റെ തെറി‍, തുപ്പല്‍ 

ഒക്കെ മനസ്സില്‍ പറ്റിപ്പിടിക്കുമ്പോള്‍ 

ഒരയിലത്തലക്കതെല്ലാം എളുപ്പം 

തിരിച്ചറിയാന്‍ കഴിയും.

ഉടല്‍മുറിവുകളില്‍ ഉറുമ്പരിക്കുമ്പോഴും 

കിടത്തിപ്പൊറുപ്പിക്കാത്ത 

കാക്ക,പൂച്ചകള്‍ .

കഴുത്തടക്കം കണ്ടിച്ചിട്ടും 

കലിയടങ്ങാത്ത കത്തിപ്പകകള്‍ 

എല്ലാമെല്ലാം 

അതെണ്ണിയെണ്ണിപ്പറയും.

ഒടുവിലെല്ലാവരേയും 

തൊട്ടു തൊട്ടു കാണിക്കും.

ഒരോട്ടുകിണ്ണത്തില്‍ 

മണിമുട്ടിപ്പാടുന്നുണ്ടതിന്‍റെ 

പെരുവഴിക്കാഴ്ച്ചകളില്‍ 

പിന്നെയും ചിലതെല്ലാം.

കാകായെന്നും 

മ്യാവൂമ്യാവൂയെന്നും.

അരങ്ങിലേക്കൊ

അടുക്കളയിലേക്കോയെന്നറിയാത

ഫ്രീസറില്‍ നിന്നെടുത്തു 

പൊരിവെയിലത്തിട്ടതിന്‍റെ 

ഒരുണക്കം മാത്രമാണപ്പോള്‍ 

അതിന്‍റെ മുള്ളിന്‍റെയുള്ളില്‍‍ .

സൈകതം  മാസികയില്‍ പ്രസിദ്ധീകരിച്ചത്