ഒരു നെരിപ്പോടിന്‍റെ നേര്‍പ്പതിപ്പ്

നല്ലനടപ്പിനു നമ്മളുണ്ടാക്കിയ

നാട്ടുവഴികളിപ്പോള്‍

നായാട്ടുസംഘങ്ങളുടെ

ദേശീയപാതകള്‍ .

ടിപ്പറിനും റിപ്പറിനും

ഒരേ വേഗം 

തമിഴനും തെലുങ്കനും

ഒരേ ഭാവം

മലയാളിക്കും മലയാഴം.

മലമറിച്ചും, പുഴയരിച്ചും

വയല്‍ നിറച്ചും മലയാലം.

ബംഗാളിയും ബീഹാറിയും

ക്വാറികളില്‍ ഭായീ ഭായീ

ഇരുട്ടില്‍ നിരത്തുമുറിച്ചാല്‍

കഴുത്തറുക്കുന്ന ക്യാഹെ ഭായി.

കൊടികളുടെ നാല്‍ക്കവലകളില്‍

കോഴിപ്പോരും ചേരിപ്പോരും.

മലയോളം വളരും പലരും

മഞ്ഞുപോലുരുകും ചിലരും.

   

പകല്‍ വണ്ടികള്‍ വൈകുന്തോറും

പാളം തെറ്റുന്ന കാലുകളില്‍

പുലരുംവരെ പിന്തുടരപ്പെടും

പാവങ്ങളില്‍ പാവങ്ങള്‍ .

വഴികളരിച്ചുപെറുക്കിയൊരു

വനസ്പര്‍ശം തിരിച്ചറിയുമ്പോള്‍

ഇരയിരിക്കുന്ന കൂട്ടില്‍ ചിലര്‍

വലവിരിച്ചു കഴിഞ്ഞിരിക്കും.

(വഴിക്കണ്ണുമായ് കാത്തിരുന്ന

ഒരമ്മമനസ്സിന്..        

ഒരു നെരിപ്പോടിന്‍റെ 

നേര്‍പ്പതിപ്പാണിപ്പോഴവര്‍ )

നല്ലനടപ്പിനുള്ള വഴികളില്‍

നാമെപ്പോഴും നടുവിലോടും.          

നരച്ച തലക്കകത്തപ്പോഴുമൊരു 

നഗരത്തിന്‍റെ തിരക്കും കാണും.